Pihak Lintô Barô:
Assalamualaikôm tgk di sinoe
Saleuem bak kamoe uroe nyoe deungön rombongan lôn sanjông
sapa
Nibak uroe nyoe geutanyoe sinoe
Bandum ka meureumpök muka
Titah sultan peusan bak kamoe
Ngön lidah ulôn nyoe tgk geuyue sambông haba
Ho tuan biesan, Tgk H. Sofian neulangkah keunoe
Nyoepat aneuk droeneuh uroe nyoe katrok kamoe ba
Neujak teurimöng nyoekeuh deungön dua jaroe
Nyoekeuh judô cut putroe singöh keuasoe kamba
Umpama jagông goh punoh asoe
Adak boh panjo tgk mantöng meusukra
Adat istiadat aneuk lôn tuan nyoe mungkén gohlom göt meuhoe
Maklum tgk droe aneuk
lôn nyoe mantöng that muda
Dak beda adat uroe nyoe bèk that neupakoe
Nyan peunténg geutanyoe tgk di sinoe taat agama
Kadang na salah tingkah aneuk lôn tuan siegeutue sahoe
Harapan kamoe bak tgk beuneutém bina
’Oh jiwoe keudéh jeut pulang keu kamoe
’Oh jiwoe keunoe mungkén tgk usaha
Rayeuek that laba nibak uroe nyoe
Meutamah sidroe dalam gampông nyoe di dalam kaka
Reudôk meugantung tgk teungöh cöt uroe
Alamat nanggroe tuhan bie bala
Haba bacut lôn balék uroe nyoe titék meugantoe
Cit meunoe bagoe cara seumapa
Nyan bèk neuharap uroe nyoe bak kamoe tgk keu barang
peuneuwoe
Atau pih keu bungöng jaroe hana ngön kamoe bloe tgk hana
beulanja
Mangat bèk putôh na dua boh bungkôh kamoe bunoe na teuba
keunoe
Meunyö keu asoe tgk meu’ah meusapue hana
Mangat bèk putôh na cit ulôn bôh saka sikiloe
Nyan pih kön atra kamoe bloe tgk atra saudara ba-ba
Aneuk cém pala di công bak panjoe
Teungöh cöt uroe lagèe nyoe tgk diwoe lam rimba
Neupeuhah tgk jurông payông meugantoe
Bèk trép that kamoe deungön rombongan lagèe nyoe sinoe di
lua
Gampông lôn jarak bak lôn jak keunoe
Neusayang keu kamoe uroe nyoe tgk meusiblah mata
Bèk lé neubie döng lagèe nyoe kamoe lam uroe
Reuôh kajiepö bak aneuk kamoe neukalön ka basah muka
Krue seumangat rahmat nibak po
Meumada èh noe dilèe lôn peuphoen sapa
Pulang keu tgk nyan po teumpat nyoe
Dua blah jaroe kamoe ateueh jeumala
Akhirulkalam haba ka sampoe
’Oh noe seuleusoe dilèe lôn sapa
Teurimöng geunaséh dari kamoe rombongan lintô barô
Pulang keu gurèe nyan po teumpat
Pihak Dara Barô:
Bismillahirrahmanirrahim
Alaikôm salam hai tgk lôn sambôt saleuem
Seureuta lôn kheuen syarat mulia
Yôh masa nabi cit kaleuh geukheun-kheun soe nyan sambôt
saleuem
Sadum ngön naleueng tuhan bie fala
Krue seumangat hai muda samlakoe
Pakön neuk jula that uroe keunoe neuteuka
Pukeuh na halangan bunoe bak tajak keunoe
Kamoe ka rangoe sinoe bak meuprèh syedara
Ranub-ranub ka layèe ka jietèt lé uroe
Kamoe ka rangoe bak meuprèh aneuk da
Alhamdulillah hai aneuk katroek cit keunoe
Deungön ijin po uroe nyoe katroek tateuka
Beuthat beujiôh sidéh di Panton Labu bak tajak keunoe
Taprèh hai aneuk droe sinan siat di luwa
Sabab cit ka meunan adat hai aneuk meuhat bak tanyoe
Masa saboh uroe di lèe kön kana
Nyoe ta peutimang adat bèk sampèe tapubloe nanggroe
Bèk sampèe lé tabloe budaya luwa
Bèk lé gop peubangai nyoe bandum geutanyoe
Nyoe budaya droe lagèe nyoe beu göt tajaga
Beujuet ta pulang keu aneuk cucoe
Marwah geutanyoe hai nyak bèk rôh gop hina
Mungkén di Panton Labu adat bak tgk kön lagèe nyoe
Bôh sigeutue sahoe nyoe kön hana that beda
Teuman beunoe na tgk meuteuöh keu barang peuneuwoe
Tgk na neubloe neupeugah sikilô saka
Hana that meuharap dikamoe nyan hai tgk keu barang peuneuwoe
Nyan peunténg geutanyoe uroe nyoe beujeut keu syedara
Kareuna pukat ka meusawak jaréng
Kareuna putèng ka meusawak bara
Kareuna aneuk miet geutanyoe uroe nyoe dua ka tapeukawen
Geutanyoe nyan laén pu kön ka jeut keu syedara
Teuman beu that pih nyan tgk ba saka sikilô
Teurasa bak kamoe nyoe ka saboh raga
Meu ie di laôt tgk hai meupuséng gisa
Dalam kuala bicah geulumbang
Ka lôn teurimöng pu nyan tgk ba
Ngön jaroe dua dilôn ngön haté seunang
Teuman nyan leupah teukeujöt ’oh lôn kalön nyan asoe raga
Sang bruek u muda keunoe leumah lôn pandang
Nyoe ka meupue wareuna inan ka meudum ukuran
Allah e tuhan nyoe biet sang hana lé kada
Meuseu adak na tabloe saboh honda
Tiep uroe masa ta ba bak jalan
Meuseu bhan dalam hai tgk tabôh u luwa
Peukeuh na meurasa tgk meunyoe lagèe nyan
Bôh kajeut cit neubôh di dalam raga
Kön neutôp meuselingka nak meudèh nyan ngön ija itam
Nyoe malèe lôn that-that bak kaôm lingka
Sang lagèe neukeunak ba keudèh nibak pameran
Kön cit lôn protèh tgk nyan teuka
Adat ngön budaya hai tgk bèk neupeumeunan-meunan
Pakön tgk galak that keu budaya luwa
Budaya droe teuh na pakön han neupeutimang
Pihak Lintô Barô:
Angén di laôt tgk jipôt meutaga
Dalam kuala bicah geulumbang
Bunoe neupeugah ka neuteurimöng pu nyan kamoe ba
Bah pih sikilô saka saboh mu pisang
Nyoe ka neupeugah lom keu asoe raga
Sang malèe neu raya watèe neupandang
Lôn lakèe meu’ah bak syeh do brama
Hana seungaja dikamoe nyan salah bak pasang
Sabab nyan bôh peunuwoe lintô lôn kalön beuklam di dalam
raga
Buet ibuk PKK lôn kalön beuklam
’Oh leuh geupasoe tuwö bak geuparéksa
Memang ureueng katuha mata kureueng trang
Mungkèn lôn lakèe meu’ah kali nyoe di kamoe ka rôh meubôh
lam raga
Nyan akan teuka eunteuk kön jeut ta bôh lam eumpang
Sabab adat Aceh nyoe bak kamoe pih kana
Tapi beusama-sama tgk ta tém peutimang
Bèk bak kamoe singöh neuyue tôp, nyan laen di buka
Nyan kiamat dônya adat nyan hana berjalan
Cuma kritik ngön saran syeh do brama
Lôn peumulia uroe nyoe ngön dada lapang
Pihak Dara Barô:
Sulu-sulu bayu di gunông
Kulét bèe bungöng asoe bèe mala
Seugolom tgk lôn peuijin tamöng
Lôn neuk teumanyöng meudua krèk haba
’Oh watèe beungöh hai tgk keumang ôn jatoe
’Oh watèe cöt uroe keumang ôn capa
Pakön teuman meugrit that nyoe lintô neupuwoe
Meudô’a manoe tgk pu kajeut dibaca?
Meunyö gohlom jeut dibaca nyan dô’a manoe
Neuyue jak meureunoe dilèe bak ulama
Nyoe dara barô lôn hana payah lèe di jak meureunoe
Cit aneuk ureueng meupoe cuco ulama
Pihak Lintô Barô:
Aneuk leuek putrue di công bak panjo
Teungöh cöt uroe lagèe nyoe jipö u luwa
Nyoe ujông ka nuejungkat sang uram ka neugilhö
Laén that bagoe ka cara seumapa
Ka neujak tanyöng trôh bak dô’a manoe
Neupikèe aneuk kamoe nyoe bangai leumpah na
Abéh dijak meununtôt baroe kön rata juet sagoe
Sampoe ’oh dudoe juet neu tanyoe bak droe jih éh hoe u
Samadua
Lôn jôk lom u pasantren u Arakundoe
’Oh dudoe jiwoe barô u Samalanga
Bak abu kuta krueng dijak meurunoe
Meu dô’a manoe aneuk kamoe ék mungkén teuk han juet dibaca
Dudoe lôn peunikah awai lôn yu jak meureunoe
Sabab meuphoem kamoe kawén nyoe kön but pura-pura
Pihak Dara Barô:
Di công ibôh hai tgk puyôh meu agam
Di công keutapang aneuk leuek puwa
Nyoe dô’a manoe neupeugah kabéh jeut dipham
Dô’a buka idang pue kajeut dibaca?
Pintô lôn palang
Neudöng sinan di luwa
Pihak Lintô Barô:
Reudôk di Aceh tgk ujeuen di Padang
Bicah geulumbang éh ho u pulô Jawa
Nyoe meujungkat ujông
Wap neugilhö uram, nyoe ka laén ragam lom cara seumapa
Bunoe neu tanyöng bak aneuk kamoe dô’a manoe pu kajeut
dipham
Nyoe katrôk bak dô’a buka idang beujeut dibaca
Meunyoe meuphom tgk dô’a buka idang
Dalam Al qur’an aneuk lôn tuan nyoe sabèe dibaca
Beuthat tan malém neu eu lagèe nyoe, tapi jitém peutimang
Aneuk lôn tuan tgk meuphom agama
Abéh lôn puebloe tanöh-tanöh blang
’Èeleumèe tuhan lôn yu jak mita
Phôn lôn yu jak beut, bak droe jih neu tanyong
Yéh ho u Palestina diwoe di sinan u Arabia
Dijak kuliah lom u nanggroe Jeureuman
Diwoe di sinan barô nanggroe Kanada
Dijak côk titél di nanggroe Jepang
Diwoe di sinan baroe u Alu Kala
’Oh trôk u Alu Kala barô geujôk jabatan
Luwa ngön dalam aneuk lôn tuan nyoe ’Èeleumèe kana
Bit han neupatéh haba ulôn tuwan
Jeut tgk undang u bak musalla
Neu mèe kitab-kitab meu lhèe boh eumpang
Neu eu jeut dipham dengön jibôh makna
Pihak Dara Barô:
Bak meuraksa hai tgk di teungöh buleuen
Patah saboh deung si layèe jeumpa
Sabab meunyö hana meukrie nyan lintô nyan
Hana jadèh lôn tueng, bah lé neuraheung sinan di luwa
Nyoe han lôn bie gilhö meu aneuk rienyeun
Neu döng lam seuuem sampoe ’oh poh sa
Sabab meunyö ta piléh tika
Kheun ureueng tuha teuntèe nyan meurie reubeueng
Meunyö ta piléh ureueng teuntèe nyan taat agama
Meurie-rie ija jeut tgk jak tiyeueng
Meurie-rie ureueng jeut tgk jak kupra
Kön, kamoe paloh nyoe bèk tgk abéh teuh, aneuk miet teu
giedham
Pihak Lintô Barô:
Gunông glé rawa tgk seureuba buleuen
Makanan bayeuen boh kayèe rimba
Lôn ikat kaôi lôn paneuk si linteueng
Beu ék lôn teumeueng sinoe di PT Aron nyoe ureueng seumapa
Meutuwah babah na ubèe lôn kheun
Meutuwah buleuen han payah mita
Rimba lôn arông gunông meulinteueng
Padum trép jameun ka di lôn lawan ku mita
Jameun na meugah hinoe di Lhokseumawe nek Rasyid Bireuen
Di the lé ureueng bak geuseumapa
Thôn dua ribèe lhèe sayang gop nyan nyawöng tuhan tueng
Nek Rasyid Bireuen geutinggai dônya
’Oh watèe hana lèe nek Rasyid Bireuen
Nyan keuh tinggai pak Alam keuureung seumapa
Na tgk tusoe ?
Aneuk manok göt tgk di nanggroe Bireuen
Manok ka useueng meulöt lam kuta
Lôn harap bak rombongan lintô neusaba siat walaupun seuuem
Bak tanyoe peunyuem nyoe bit lawan sang teuga
Meunyoe gop nyan pök uroe nyoe teuntèe tanyoe theun
Leubèh ngön kureueng lôn harap eunteuek beu ék neusaba
Tajak u Cöt Go tgk beutrök u Piyeueng
Tajak u Leupung röt jalan Lhoknga
Meuka bicah phèt sakét lam tuleueng
Beurangsoe ureueng sinoe jeut neutanyöng pasti han ék disaba
Padum krèk ija neupeugah sinoe nyang ka lôn diyeueng
Padum droe ureueng saknyoe neukheun sinoe nyan ka lôn kupra
Nyoe lintô barô nyoe umpama ija palikat kamoe meuka meujeut
jak tiyeueng
Kön ija meuteumeung lam guni monja
Tajak u Gayo tgk tawoe röt Bireuen
Tajak u Bayeun röt Sungo Raya
Meunyoe até ka teupèh beurangsoe jeut neutanyöng han ék
tapeutheun
Neutém yu raheueng kamoe di luwa
Sampé han neubie gilhö meu aneuk rienyeun
Pat töh neuteumeung lagèe nyoe haba
Meunyö lintô uroe nyoe katrok lôn puwoe bit-bit han neutueng
Nyan ka neutaguen dari beuklam nyan keu soe neu neuk ba
Bah sinan basi ju geurayueng
Lôn lakèe ijin lintô jak ta peugisa
Reudôk di glé ujeuen meugeudhum
Hanyöt dalam krung cabeueng geulima
Lôn jak seumapa phôn dari Banda Aceh sampoe trok é ho u Alu
Papeun
Gohlom lôn teumeung lagèe nyoe haba
Bèk neumeulét-lét uroe nyoe ngön aneuk Rimueng
Bèk neumeuplueng-plueng ngön aneuk Kuda
Beurani neulét meunyoe kamoe plueng
Meuka meukaleueng kamoe pih panèe meusaba
Meunyoe neujôk lapan uroe nyoe lôn pulang teutap sikureueng
Talô han lôn tueng di lôn meunang lôn mita
Bèk lam ’an talô kamoe uroe nyoe seurie meuhan meutueng
Malèe meungön ureueng watèe meugisa
Pihak Dara Barô:
Ramphak-ramphak hai tgk bak murong di leuen
Bak ujông cabeueng eumpung cém pala
Beuthat neupeugah droe neuh nyan murid Alm. nek Rasyid
Bireuen
Gohlom teuntèe ék neulinteueng meunyoe tingkat syeh Do Brama
Ilôn pih lôn jak seumapa bak binèh laôt sampoe trôk u binèh
papeuen
Gohlom meutumeung nyan sabèe pada
Nibak uroe nyoe sinoe di PT Aron nyoe takalön so nyan leubeh
useueng
Apa ngön kumun nak takalön uroe nyoe soe nyang juara
Watèe ie surôt hai tgk jimudèp udeueng
Watèe ie paseueng hai tgk jimudèp kadra
Meubaroe siat di tgk lôn yu raheueng
Ka mirah ôn glunyueng ka seuuem ngön muka
Beungèh cina hai tgk seulampang lhèe dara
Beungèh rakan kaôm nyan droe prèh
Sumpah kalowie janji ka leupah
Meunyoe neu ubah hai kamoe uroe nyoe barô takih
Meunyoe tajak u Lhok Nibong hai tgk beutrôk u panté Bidari
Meukrie-krie sinan di gampông ma
Bèk lèe hai tgk geutanyoe meudakwa-meudakwi
Sang hana göt hi ’oh gop ngieng rupa
Pulom aneuk miet nyoe uroe nyoe ka sah suami isteri
Ka geumeukhanduri neukalon nyoe geupeugöt pesta
Dua boh keluarga nyoe kajeut keu taloe wali
Meu GAM ngön RI jinoe pih hana lèe dawa
Pulom geutanyoe !!
Aneuk tulô hai tgk jipö ngön kawan
Aneuk rat nanggang teureubang dua
Pintô pih ka lôn buka hai tgk payông pih ka lôn keumang
Lôn peusilakan bandum syedara
Ho ka ma peudampéng côk ranup batèe neubôh lam puan
Neujak tueng rombongan déh pat di luwa
Neuduek neupiyôh hai tgk pat-pat nyan lapang
Deungön makanan cit ka kamoe siap sedia
Neupeusingét cipé neupeubasah jaroe
Maklum tgk droe meubu ngön sira
Engkôt di laôt peuwèt-wèt iku
Tgk pajôh bu kuah ie mata
Kuah boh labu gulè bak pisang
Cit meunan reusam kamoe di desa.
0 Comments